22.01.2026
Yanvarın
22-də Konstitusiya Məhkəməsinin sədri Fərhad Abdullayev Qırğız Respublikasının
Azərbaycan Respublikasındakı fövqəladə və səlahiyyətli səfiri Maksat Mamıtkanovla
görüş keçirib.
Qonağı
salamlayan sədr Fərhad Abdullayev bildirib ki, Azərbaycan Respublikasının
Prezidenti cənab İlham Əliyev və Qırğız Respublikasının Prezidenti cənab Sadır Japarov arasında formalaşmış qarşılıqlı
etimada əsaslanan əməkdaşlıq dövlətlərarası əlaqələrin möhkəmlənməsində vacib
rol oynayır. İkitərəfli münasibətlərin inkişafında dövlət başçıları səviyyəsində
qarşılıqlı səfərlərin və görüşlərin müstəsna rolu qeyd edilərək vurğulanıb ki,
prezidentlərimiz arasında dostluq və qardaşlıq əlaqələri strateji tərəfdaşlıq dinamikasına
mühüm təsir edir.
Sədr
vurğuladı ki, Qırğız Respublikasının sülh və quruculuq prosesinə dəstəyi təqdirəlayiqdir,
xüsusilə də Qırğız Respublikasının Prezidentinin təşəbbüsü ilə Ağdamın Xıdırlı
kəndində orta məktəbin inşa edilməsi bu dəstəyin bariz nümunəsidir.
Qeyd olunub ki, Türk Dövlətləri Təşkilatına
üzv olan türkdilli ölkələrin konstitusiya ədalət mühakiməsi sahəsində fəaliyyət
göstərən orqanları arasında hüquqi əməkdaşlıq mühüm əhəmiyyətə malikdir. Həmçinin,
sədr vurğulayıb ki, Türk Dünyası Konstitusiya Yurisdiksiyaları Konfransı
(TÜRK-AY) ortaq hüquqi dəyərlərin təşviqi baxımından önəmlidir.
Səfir
Maksat Mamıtkanov səmimi qəbula görə minnətdarlığını bildirərək, ölkələrimiz arasında əsrlər boyu yaranan
etnik, mədəni, dini bağlara əsaslanan dostluq münasibətlərinə, həmçinin Azərbaycan
və Qırğızıstan arasında bütün səviyyələrdə qarşılıqlı anlaşmanın və səmərəli əməkdaşlığın
mövcudluğuna toxunmuşdur. O, ölkəmizdə fəaliyyəti dövründə Qırğız
Respublikasının Azərbaycan Respublikası ilə digər sahələrdə olduğu kimi, məhkəmə-hüquq
sahəsində də əlaqələrin genişləndirilməsinə öz töhfəsini verəcəyini diqqətə
çatdırıb.
Daha
sonra qarşılıqlı hüquqi məsələlər ətrafında fikir mübadiləsi aparılıb.
