02.09.2025
Azərbaycan
Respublikası Konstitusiya Məhkəməsinin hakimi Rauf Quliyev və Aparatın
Vətəndaşların qəbulu və şikayətlər
şöbəsinin müdiri Rüstəm Səlimov 26-27
avqust 2025-ci il tarixlərində keçirilən Asiya Konstitusiya Məhkəmələri və
Ekvivalent İnstitutlar Assosiyasiyasının Tədqiqat və İnkişaf üzrə Katibliyinin
5-ci Beynəlxalq Simpoziumunda iştirak etmək üçün Koreya Respublikasının Seul şəhərində
səfərdə olmuşlar.
Tədbirin açılışında Koreya Respublikası
Konstitusiya Məhkəməsinin sədri Kim Sanghwan qonaqları salamlamışdır.
Koreya, Türkiyə, Özbəkistan, Pakistan, Qazaxıstan,
Tacikistan, Rusiya, Banqladeş, İndoneziya, Filippin, Hindistan, Tailand,
Malayziya və digər Asiya ölkələrinin konstitusiya ədalət mühakiməsi
orqanlarının hakim və Aparat əməkdaşlarının iştirakı ilə keçirilən Simpoziumda şəxsi toxunulmazlıq hüququnun
müəyyən edilməsi və həmin hüququn qanuni məhdudiyyətləri ilə bağlı konstitusiya
məhkəmələrinin təcrübəsi üzrə məruzələr dinlənilmiş və geniş fikir mübadiləsi
aparılmışdır.
Azərbaycan Respublikası Konstitusiya Məhkəməsinin
hakimi Rauf Quliyev məruzə ilə çıxış edərək, Azərbaycan Respublikası
Konstitusiya Məhkəməsinin 25 noyabr 2024-cü il tarixli “Azərbaycan Respublikası
Konstitusiyasının 33-cü maddəsində nəzərdə tutulmuş mənzil toxunulmazlığı
hüququ baxımından Azərbaycan Respublikası Cinayət Məcəlləsinin 157-ci
maddəsində əks olunmuş “mənzil” anlayışının şərh edilməsinə dair”
qərarında əks olunmuş Konstitusiya Məhkəməsinin hüquqi mövqelərini tədbir
iştirakçılarının diqqətinə çatdırmışdır.
Səfər çərçivəsində Simpozium iştirakçıları Koreya Respublikasının Konstitusiya Məhkəməsinin binasında olmuş, məhkəmənin praktiki fəaliyyəti ilə tanış olmuşlar.
