Azərbaycan Respublikasının Konstitusiya Məhkəməsi Azərbaycan Dövlət İqtisad Universitetinin Türk dünyası iqtisad fakültəsində hüquq olimpiadası keçirib

Xəbərlər

2023 Mar

17.03.2023

Ümummilli Lider Heydər Əliyevin anadan olmasının 100 illiyi münasibətilə Konstitusiya Məhkəməsinin, Elm və Təhsil Nazirliyinin, Gənclər və İdman Nazirliyinin birgə təşkilatçılığı ilə Azərbaycan Dövlət İqtisad Universitetinin Türk dünyası iqtisad fakültəsində “Heydər Əliyev və hüquqi dövlət” adlı hüquq olimpiadası keçirilib. Olimpiadaya Bakı Slavyan Universitetinin Humanitar və Sosial elmlər fakültəsinin Azərbaycan Respublikasının Konstitusiya Məhkəməsində təcrübə keçən tələbələri də qoşulmuşlar.

Hüquq olimpiadasının nəticələrinin elan olunması ilə əlaqədar təşkil olunmuş tədbirdə Konstitusiya Məhkəməsi Aparatının məsul əməkdaşları, Azərbaycan Respublikası Elm və Təhsil Nazirliyinin, Azərbaycan Respublikası Gənclər və İdman Nazirliyinin məsul nümayəndələri, Azərbaycan Dövlət İqtisad Universitetinin Türk dünyası iqtisad fakültəsinin müəllimləri və tələbələr  iştirak etmişlər.

Tədbirdə əvvəlcə Azərbaycan və Türkiyə Respublikalarının Dövlət Himnləri səsləndirilmiş, Vətən uğrunda canından keçən şəhidlərimizin xatirəsi bir dəqiqəlik sükutla anılmışdır.

Azərbaycan Dövlət İqtisad Universitetinin Türk dünyası iqtisad fakültəsinin dekanı, professor, doktor Mehmet Yüce, həmin fakültənin müəllimlərindən h.ü.f.d Xanəhmədov Nəriman, Muradzadə İmanqulu çıxış edərək bu il ölkə ictimaiyyətinin müstəqil Azərbaycan dövlətinin qurucusu, xalqımızın Ulu Öndəri Heydər Əliyevin anadan olmasının 100 illiyini böyük ehtiramla qeyd etməsini bildirmiş, Azərbaycanda demokratik dəyərlərin bərqərar olmasının, hüquqi, dünyəvi dövlət quruculuğu prosesinin başlanılmasının Ümummilli Lider Heydər Əliyevin adı ilə bağlı olduğunu xüsusilə vurğulayaraq, Ulu Öndərin həyata keçirdiyi əsaslı islahatların respublikamızı inkişaf yoluna çıxarmaqla yanaşı, ilk milli Konstitusiyanın hazırlanması və qəbulu üçün şərait yaratdığını qeyd etmişlər.

Çıxış edənlər Ümummilli Lider Heydər Əliyevin bilavasitə rəhbərliyi ilə hazırlanmış yeni Konstitusiyanın dövlət quruluşunun əsaslarını müəyyən edərək, xalqın dövlət hakimiyyətinin yeganə mənbəyi olmasını bəyan etməsini, milli dövlətçiliyimizin möhkəmlənməsinin, insan hüquq və azadlıqlarının müdafiəsi sahəsində həyata keçirilən mütərəqqi hüquqi islahatların əsasının məhz Ümummilli Lider Heydər Əliyevin adı ilə bağlı olmasını vurğulamışlar.

Konstitusiya Məhkəməsi Aparatının Konstitusiya hüququ şöbəsinin müdiri Dürdanə Məmmədova Konstitusiya Məhkəməsinin sədri Fərhad Abdullayevin təbrikini tədbir iştirakçılarının diqqətinə çatdıraraq, olimpiadanın nəticələrini elan etmişdir. Olimpiadanın nəticələrinə əsasən, yüksək bal toplayaraq fərqlənmiş 14 tələbəyə Konstitusiya Məhkəməsinin təsis etdiyi diplom və hədiyyələr təqdim olunmuşdur.