02.03.2023
Martın 2-də
Azərbaycan Respublikası Konstitusiya Məhkəməsinin sədri Fərhad Abdullayev Avropa Şurasının Bakıdakı Ofisinin rəhbəri
Petr Zix ilə görüşüb.
Görüşdə Fərhad
Abdullayev Azərbaycan Respublikası Konstitusiya Məhkəməsinin fəaliyyəti
haqqında məlumat verərək, Azərbaycan Respublikası ilə Avropa Şurası arasında səmərəli
hüquq əməkdaşlığının vacibliyini qeyd edərək ölkəmizdə məhkəmə-hüquq sahəsində
aparılan islahatlar, insan hüquqlarının təmin olunması sahəsində məhkəmələrin
qarşısında duran vəzifələri, habelə İnsan Hüquqları üzrə Avropa Məhkəməsi ilə əməkdaşlığın
və həmin məhkəmənin presedent hüququnun əhəmiyyəti vurğulanmışdır.
Avropa Şurasının Bakıdakı Ofisinin rəhbəri Petr Zix Azərbaycanla
Avropa Şurası arasında əməkdaşlıq və qarşılıqlı anlaşma əsasında həyata keçirilən
bir sıra layihələr haqqında məlumat vermiş, bu əməkdaşlığın məhkəmə-hüquq sahəsində
daha da genişləndirilməsinin xüsusi önəmini diqqətə çatdırmışdır. O, gələcəkdə
də Konstitusiya Məhkəməsi ilə əməkdaşlığın faydalı olacağına ümid etdiyini və qarşılıqlı əlaqələrin inkişafında maraqlı
olduğunu vurğulamışdır.
Sonda sədr qurumlar arasında səmərəli əməkdaşlığın davam edəcəyinə
ümidvar olduğunu qeyd etmiş və Petr Zixə ölkəmizdəki fəaliyyətində uğurlar
arzulamışdır.
