1965-ci il 20 iyun tarixində Bakı şəhərində anadan olmuşdur.

1982-ci ildə Azərbaycan Respublikası Bakı Şəhər Məhkəməsində iclas katibi vəzifəsindən əmək fəaliyyətini başlamışdır.

1987-ci ildə İ.İ.Meçnikov adına Odessa Dövlət Universitetinin hüquq fakültəsinə daxil olmuş, 1990-cı ildə Bakı Dövlət Universitetinə keçirilmiş, və 1993-cü ildə həmin universitetin hüquq fakültəsini bitirmişdir. Odessa Milli Hüququ Akademiyasının aspiranturasında elmi fəaliyyətini davam etdirmişdir.

1998-ci ildə “İnsan və vətəndaş konstitusiya hüquq və azadlıqları və insan hüquqları üzrə beynəlxalq standartlar (Azərbaycan, Ukrayna və Rusiya ölkələrinin təcrübəsi əsasında)” mövzusunda Konstitusiya hüququ - 12.00.02 ixtisası üzrə namizədlik dissertasiyasını müdafiə etmişdir.

Bakı Dövlət Universitetinin Konstitusiya hüququ kafedrasında 0,5 ştat kafedranın professoru vəzifəsində işləyir. 2006-cı ilin 28 mart tarixində dosent elmi adı almışdır.

2004-2007-ci illərdə Odessa Milli Hüquq Akademiyasının Konstitusiya hüququ ixtisası üzrə doktoranturasında təhsilini davam etdirmişdir. 

2006-cı ildən Azərbaycan Respublikası Milli Məclisinin (Parlament) Hüquq siyasəti və dövlət quruculuğu Komitəsində ekspert vəzifəsində, 2008-ci ildən isə Milli Məclis (Parlament) Aparatının Dövlət quruculuğu üzrə qanunvericilik şöbəsi müdirinin müavini vəzifəsində işləmişdir.

2002-ci ildə milli ekspert qismində Azərbaycan Respublikasının hüquq sisteminin “İnsan hüquq və əsas azadlıqlarının müdafiəsi haqqında” Avropa Konvensiyasına uyğunluğu üzrə Milli Hesabatın hazırlanmasında iştirak etmişdir.

Konstitusiya hüququ ixtisası üzrə bir sıra elmi məqalə və tədris materialların müəllifidir.

22 iyun 2010-cu ildə Azərbaycan Respublikası Prezidentinin təqdimatı əsasında Azərbaycan Respublikası Milli Məclisinin Qərarı ilə Konstitusiya Məhkəməsinin hakimi vəzifəsinə təyin olunmuşdur.

2016-cı ildə İşgəncə və qeyri-insani, yaxud ləyaqəti alçaldan rəftar və ya cəzanın qarşısının alınmasına dair Avropa Komitəsinin (İQAK) üzvü seçilib.

2017-ci ilin 15 sentyabr tarixində “Azərbaycan Respublikasının Konstitusiya Məhkəməsi: nəzəriyə və təcrübə” mövzusunda doktorluq dissertasiya işini Ukraynanın “Odessa hüquq akademiyası” Milli Universitetində müdafiə etmişdir.

2018-ci ilin 13 iyul tarixində Azərbaycan Respublikasının Prezidenti yanında Ali Attestasiya Komissiyasının qərarı əsasında ona hüquq elmləri üzrə doktoru elmi dərəcəsi verilmişdir.

Azərbaycan Respublikası Prezidentinin 9 iyul 2018-ci il tarixli Sərəncamı ilə "Tərəqqi" medalı ilə təltif edilib.

Azərbaycan Respublikası Prezidentinin 27 may 2019-cu il tarixli Sərəncamı ilə “Azərbaycan Xalq Cümhuriyyətinin 100 illiyi (1918 - 2018)” yubiley medalı ilə təltif edilmişdir.

Azərbaycan Respublikası Prezidentinin 13 iyul 2023-cü il tarixli Sərəncamı ilə 3-cü dərəcəli “Vətənə xidmətə görə” ordeni ilə ilə təltif edilmişdir.

Azərbaycan Respublikası Prezidentinin 02 fevral 2024-cü il tarixli Sərəncamı ilə “Heydər Əliyevin 100 illiyi (1923-2023)” yubiley medalı ilə təltif edilmişdir.

Ailəlidir. İki övladı var.