ANA SƏHİFƏ » 2018-06-22 Əlcəzairin ədliyyə nazirinin başçılıq etdiyi nümayəndə heyəti ilə Konstitusiya Məhkəməsində görüş keçirilib

Ölkəmizdə səfərdə olan Əlcəzair Xalq Demokratik Respublikasının ədliyyə naziri Tayeb Louhun başçılıq etdiyi nümayəndə heyəti ilə iyunun 22-də Azərbaycan Respublikası Konstitusiya Məhkəməsində görüş keçirilib.

Əlcəzair nümayəndə heyətinin Azərbaycana səfərindən məmnunluğunu bildirən Konstitusiya Məhkəməsinin sədri Fərhad Abdullayev səfər çərçivəsində keçirilən səmərəli görüşlərin ölkələrimiz arasında münasibətlərin inkişafı baxımından əhəmiyyətini vurğulayıb.

Azərbaycan Respublikası Konstitusiya Məhkəməsinin fəaliyyəti barədə qonaqlara ətraflı məlumat verən Fərhad Abdullayev bildirib ki, ulu öndər Heydər Əliyevin təşəbbüsü və müəllifliyi ilə 1995-ci ildə müstəqil Azərbaycan Respublikasının ilk Konstitusiyasının qəbul olunmasından dərhal sonra məhkəmə-hüquq sahəsində genişmiqyaslı islahatların həyata keçirilməsinə başlanılıb. Diqqətə çatdırılıb ki, Konstitusiyada ilk konstitusiya nəzarət orqanının – Konstitusiya Məhkəməsinin yaradılması da əksini tapmışdı. Konstitusiyanın qəbulundan üç il sonra ümummilli lider Heydər Əliyevin Fərmanına əsasən Azərbaycan Respublikası Konstitusiya Məhkəməsi formalaşdırılıb və bu sahədə mütərəqqi beynəlxalq təcrübəni nəzərə almaqla fəaliyyətə başlayıb.

Fərhad Abdullayev Konstitusiyada Azərbaycan Respublikasının hüquqi, demokratik və dünyəvi dövlət olmasının əksini tapdığını qeyd edərək vurğulayıb ki, 2001-ci ildə İnsan hüquqlarının və əsas azadlıqların müdafiəsi haqqında Avropa Konvensiyasına qoşulan Azərbaycan beynəlxalq təcrübəyə böyük əhəmiyyət verərək məhkəmə-hüquq sahəsində Avropanın müvafiq qurumları ilə səmərəli əməkdaşlıq edir.

Sədr Fərhad Abdullayev əsas vəzifəsi qanunların Azərbaycan Respublikasının Konstitusiyasına uyğunluğuna nəzarət edilməsi olan Konstitusiya Məhkəməsinin fəaliyyətə başlamasının iyulun 14-də 20 illiyinin tamam olacağını diqqətə çatdırıb. Qeyd edib ki, ötən müddət Konstitusiya Məhkəməsinin vacib təsisat olduğunu göstərdi. İnsan hüquq və azadlıqlarının məhkəmə-hüquq müdafiəsinə xüsusi önəm verilərək, 2002-ci ildə Əsas Qanuna edilən əlavə və dəyişikliklərdən sonra Konstitusiya Məhkəməsinə müraciət etmək hüququ daha da genişləndirilib. Bu dəyişikliklərdən sonra ombudsmanla yanaşı, hüquqi və fiziki şəxslər də Konstitusiya Məhkəməsinə birbaşa müraciət etmək hüququ qazandılar. Ötən dövrdə Konstitusiya Məhkəməsinin Plenumu tərəfindən ümumilikdə 371 qərar qəbul edilib. Son illərdə beynəlxalq konstitusiya ədalət mühakiməsi sahəsində də fərdi şikayətlər vasitəsilə ədalət mühakiməsinin təmin edilməsi tendensiyasının güclənməsi müşahidə olunur.

Nümayəndə heyətinin sədri Tayeb Louh Azərbaycan ilə Əlcəzair arasında müxtəlif sahələrdə təcrübə mübadiləsinin vacibliyini qeyd edərək, ölkəsinin Konstitusiya Şurası ilə Azərbaycanın Konstitusiya Məhkəməsi arasında əməkdaşlığın inkişafında maraqlı olduqlarını diqqətə çatdırıb. Əlcəzairin məhkəmə-hüquq sistemi və Konstitusiya Şurasının fəaliyyəti barədə ətraflı məlumat verən qonaq ölkələrimizin Konstitusiya sistemlərində oxşarlığın olduğunu diqqətə çatdırıb.

Hüquqi dövlətin inkişafında Konstitusiya Şurasının vacib missiyasını xüsusi vurğulayan Tayeb Louh bildirib ki, Əlcəzairin Konstitusiya Şurası normativ hüquqi aktlarla yanaşı, qüvvəyə minməmiş beynəlxalq müqavilələrin də ölkənin Əsas Qanuna uyğunluğunu yoxlayır. Nümayəndə heyətinin rəhbəri 2016-cı ildə Əlcəzair Konstitusiyasına edilən dəyişikliklərdən sonra Konstitusiya Şurasına müraciət etmək hüququnun genişləndirildiyini vurğulayıb.

Yüksək qonaqpərvərliyə və ətraflı məlumata görə Konstitusiya Məhkəməsinin sədri Fərhad Abdullayevə minnətdarlığını ifadə edən Əlcəzairin ədliyyə naziri Tayeb Louh Azərbaycanın sürətli inkişafından və ölkəmizin gözəlliyindən məmnunluğunu bildirib.

Görüşün sonunda qarşılıqlı olaraq xatirə hədiyyələri təqdim edilib, fotoşəkil çəkdirilib.

Sonda qonaqlar Konstitusiya Məhkəməsinin Plenum zalı ilə tanış olublar.